Tra
i 14 e i 16 di Fevrâr une delegazion di deputâts dal Parlament
european e sarà in visite intal Paîs Basc par cjatâsi cun
rapresentants istituzionâi e de societât civîl par fâ il pont su
la situazion dai presonîrs politics. A passe cuatri agns de fin de
lote armade, plui di 400 bascs si cjatin ancjemò intes presons
spagnolis e uns 70 ta chês francesis. Si trate di un teme une vore
sintût intal Paîs Basc là che la bataie pe difese dai dirits dai
presonîrs e à simpri cjatât une poie trasversâl. La sô soluzion
duncje e judarès a dâ fondis plui saldis al procès di pâs. Prime
che une cuistion politiche, si trate però di garantî il rispiet dai
dirits umans: la politiche penitenziarie e massime la dispersion dai
presonîrs intai sîts i plui lontans dal lôr paîs di divignince,
di fat, e va fintremai cuintri de legjislazion statâl. Un dai
compits dai eurodeputâts al è chel di difindi i dirits umans, al à
ricuardât un dai parlamentârs che a saran intal Paîs Basc, tal
marcâ la preocupazion pe maniere che la Spagne e trate i presonîrs
bascs. La delegazion e je formade di eurodeputâts espression di
nazionalitâts minorizadis (catalans, galizians e flamants), di stâts
nordics (Letonie e Svezie) e de çampe radicâl (la todescje Die
Linke e l’irlandês Sinn Féin).
Font:
Naiz:,
28/01/16
Nessun commento:
Posta un commento