Cundut
de fin dal conflit armât intal Paîs Basc, intal stât spagnûl a
van dilunc lis condanis cuintri di militants indipendentiscj. La
Audiencia Nacional,
o sei l’orghin judiziari che al à cjapât sù la ereditât dai
tribunâi speciâi di ete franchiste, al à condanât a sîs agns di
preson siet dai vincjevot fantats leâts ae organizazion zovanîl
Segi. Par protestâ cuintri di chê che e ven calcolade di sentence
politiche, e je za stade anticipade la volontât di inmaneâ une
mobilitazion popolâr ai 16 o ai 17 di Mai. Cun di fat, lis condanis
si riferissin dome a ativitâts politichis davueltis dai fantats e si
poin su lis tesis de polizie e su declarazions otignudis intant che i
zovins si cjatavin in regjim di incomunicazion. Diviers di lôr a àn
ancje declarât di vê patît abûs e torturis intant di chel
periodi, acusis che però la magjistrature spagnole no à tignût in
nissun cont.
A
chest proposit, juste cualchi zornade prime de publicazion de
sentence, cuntun judizi ae unanimitât, il Tribunâl european pai
dirits umans al à condanât il stât spagnûl par no vê investigât
suntune denuncie di torture fate indenant di un altri militant
indipendentist basc. Il fat al jere capitât intal 2011 cuant che
Patxi Arratibel al jere stât arestât cu la acuse di fâ part de
organizazion politiche basche Ekin. Dopo vê completât cence
risultât i diviers grâts di judizi intal stât spagnûl, il so câs
al è rivât al esam dal Tribunâl european pai dirits umans che, in
plui di condanâ lis autoritâts di Madrid, al domande di cjapâ
misuris par evitâ altris câs di torture favorîts massime dal
sisteme de incomunicazion. No je la prime volte che il stât spagnûl
al ven condanât par câs dal gjenar, ma fin cumò nol à fat nuie
par evitâ che si vedin altris abûs o torturis.
Font:
Naiz:,
05-07/05/15
Nessun commento:
Posta un commento