24/01/15

Paîs Basc: presonîrs, manifestazions e azions repressivis

Chê jenfri i 10 e i 17 di Zenâr intal Paîs Basc e je stade une setemane che plui di altris e à vût al centri la cuistion dai presonîrs politics che, cundut che ETA e à metût fin zaromai di timp ae sô lote armade, in centenârs a son ancjemò sierâts intes presons spagnolis e francesis. Sabide ai 10 di Zenâr almancul 80 mil personis a vevin jemplât lis stradis di Bilbo / Bilbao par rivendicâ il rispiet dai dirits dai presonîrs bascs che no puedin gjoldi nancje di chei trataments previodûts de leç e garantîts a cui che al è condanât par crimins comuns, tant che podê scontâ la condane te preson plui dongje di cjase o vê i sconts di pene che a valin par ducj chei altris.
Nancje doi dîs dopo, su ordin di un judiç de Audiencia Nacional (l’orghin judiziari che al à cjapât il puest dai tribunâi speciâi di ete franchiste), la polizie spagnole e à arestât dodis avocats e altris cuatri personis impegnadis inte difese dai presonîrs e e à secuestrât i bêçs racuelts intant de manifestazion a pro de assistence legâl dai presonîrs. Une operazion che e à jevât la indignazion dai partîts, dai sindacâts e de plui part de societât basche, cu la diestre spagnoliste uniche a difindi i arescj. Fintremai l’ordin dai avocats spagnûi al à jevât la sô critiche par une operazion che e meteve a risi fintremai il dirit ae difese. Propit par vie di cheste azion, par altri, si à vût di rinviâ un procès cuintri 35 militants de çampe indipendentiste basche. Tal zîr di un pâr di zornadis ducj i dodis avocats a son stâts liberâts, intant che par trê di chês altris personis fermadis si son vierzudis lis puartis de preson. In rispueste a cheste operazion di “becjarie mediatiche”, cemût che le à clamade Amaia Izko une des avocadis arestadis e puartevôs dal partît de çampe indipendentiste Sortu, si à decidût di inmaneâ daurman une gnove manifestazion che, cundut des dificoltâts logjistichis, sabide ai 17 di Zenâr e à puartât in place a Donostia passe 33 mil personis.
Font: Naiz:, 10-18/01/15

Nessun commento: