07/06/13

Paîs Basc: manifestazion tal Nord par une coletivitât teritoriâl

Passe cinc mil personis si son dadis adun il prin di Jugn a Baiona / Bayonne par rivendicâ la nassite di une Coletivitât teritoriâl che e cjapi dentri dute Ipar Euskal Herria, o sei la part setentrionâl dal Paîs Basc che si cjate dentri intal stât francês. In prime file, daûr dal strisson cu la scrite “Lurralde kolektibitatea orain!” (Coletivitât teritoriâl cumò), a jerin cetancj rapresentants politics (socialiscj, ecologjiscj, nazionaliscj bascs, centriscj e di altris areis politichis ancjemò) e aministradôrs locâi, ma ancje i rapresentants des categoriis economichis e des organizazions culturâls che a sostegnin cun fuarce cheste rivendicazion. L’obietîf al è chel di svilupâ un sogjet juridic di dirit public che al cjapi il puest dai dipartiments atuâi e che al vedi competencis autonomis sul plan de economie, dai traspuarts, de agriculture, dal turisim, de cjase, de cooperazion transfrontaliere, de culture e de lenghe basche. La vilie de manifestazion, il ministri francês dal interni Manuel Valls, che si veve za fat notâ pe sô linie dure cuintri des rivendicazions baschis, al jere intervignût par manifestâ la sô contrarietât publiche al progjet.
Font: Le Journal du Pays Basque, 01/06/13; Gara, 02/06/13; La République des Pyrénées, 02/06/13

Cossovo: inviade une gnove television serbe

Ai 29 di Mai e à tacât a trasmeti la gnove television serbe TV Centar, la prime a cuvierzi vie cabli dut il teritori dal Cossovo. Si trate de prime stazion televisive a fâlu dopo de vuere dal 1998-99 che e veve lassât in pîts dome cualchi television locâl logade intes areis a maiorance serbe. TV Centar e je logade a Čaglavica e e fâs part dal grup KIM za atîf cuntune emitente radiofoniche e diviers sîts internet di informazion par serp. L’obietîf declarât al è chel di ufrî a ducj i serps che a vivin ancjemò in Cossovo un imprest di informazion inte lôr lenghe e atent al lôr pont di viste. Intant ancje RTK, il gjestôr de radiotelevision publiche cossovane, al à fat savê di jessi daûr a lavorâ par un canâl televisîf par serp.
Font: Balkan Insight, 30/05/13

Corsiche: tension alte dopo dal arest di zovins indipendentiscj

L’arest di un grup di militants de organizazion Ghjuventù Indipendentista al à tornât a alçâ la tension in Corsiche. Inte suaze di une inchieste par une schirie di atentâts fats vie pal 2012 a Corti / Corte, diviers membris de organizazion indipendentiste zovanîl a son stâts arestâts de polizie francese e intant che une part e je stade puartade a Bastia, altris cinc a son stâts trasferîts daurman sul continent. Cheste operazion e à puartât a di une cjolte di posizion une vore dure de bande di Ghjuventù Indipendentista che dopo vê domandât che i siei militants a vegnin liberâts daurman, e à fevelât di metodologjiis repressivis degnis di une justizie colonialiste e si è declarade pronte a tignî bot al rapuart di fuarce cul stât.

Ongjarie: acuardi par sburtâ la imprenditorialitât rom

La Cjamare pal cumierç e pe industrie ongjarese (MKIK) e à sotscrit un acuardi cul organisim di autoguvier dai rom (ORO) par cjapâ dentri esperts e rapresentants di cheste comunitât intal svilupâ percors di formazion e di nassite di progjets imprenditoriâi pai rom. L’intindiment al è chel di ufrî a plui o mancul 35 mil rom dai cors di educazion secondarie o di formazion professionâl che ur permetin di svilupâ lis lôr capacitâts di imprese di maniere di judâ la lôr situazion economiche e la integrazion inte societât ongjarese. L’obietîf plui ambiziôs dal acuardi però al è chel di rivâ a impleâ dentri dal 2015 100 mil rom che in dì di vuê a son disocupâts.
Font: Politics.hu, 29/05/13

Paîs Basc: propuestis par sblocâ il procès di pâs

Ai 27 di Mai il Forum Sociâl, iniziative che e à lis sôs fondis intal Paîs Basc ma che e conte ancje su la poie di esperts e organisims internazionâi, al à fat cognossi lis sôs racomandazions par dâi un sburt al procès di pâs basc che zaromai di mês al somee jessi ret e fer. Si trate di dodis ponts che a proponin a ducj i sogjets cjapâts dentri intal conflit dai pas concrets par superâ chest bloc dal procès che al è leât massime al imobilisim dai guviers di Madrid e di Parîs. Prin di dut si invide ducj i sogjets a svilupâ iniziativis di dialic e di riconciliazion par dâi fondis saldis al procès di pâs e ai siei obietîfs principâi, o sei il disarmament e il dismantelament des struturis militârs di ETA, il reinseriment dai presonîrs e dai dispatriâts, il plen rispiet dai dirits umans, une analisi oneste di ce che al è sucedût che e rindi plui facile la convivence.

France: riforme de scuele, pas indenant pes lenghis

Ai 24 di Mai il Senât francês al à fat bon il progjet di leç su la riforme de scuele. Rispiet al test origjinâl a son passâts diviers emendaments che a àn permetût di miorâ la situazion des cussì clamadis “lenghis regjonâls”, consideradis ancje intal proviodiment tant che part vive dal patrimoni de France. Al è stât gjavât ogni riferiment al consens dai gjenitôrs e duncje lis scuelis des areis là che chestis lenghis a son dopradis a podaran insegnâ sei lis lenghis che lis culturis “regjonâls” intal orari curicolâr. Cun di plui chestis lenghis a podaran jessi dopradis ancje in forme veicolâr par insegnâ altris materiis. Pal ministri francês pe educazion, il stât no si veve mai sburtât cussì indenant inte valorizazion des lenghis e des identitâts locâls inte scuele.
Font: Agence Bretagne Presse, 28/05/13

Val di Aoste: il guvier de regjon al reste ai autonomiscj

Lis elezions regjonâls che si son tignudis in Val di Aoste ai 26 e 27 di Mai a àn confermât ae vuide de Regjon autonome i autonomiscj de Union Valdôtaine (33,47% dai vôts e 13 elets) che si presentavin in aleance cun altris dôs formazions di aree autonomiste moderade, o sei il moviment Stella Alpina (12,25% e 5 elets) e la Fédération Autonomiste (2,18%). Lis trê formazions adun a àn passât il 47% dai consens e otignût 18 elets in consei regjonâl. A contindiur la vitorie e je stade une coalizion formade di partîts progressiscj, sei di aree autonomiste che statâl, che e à passât di pôc il 40% dai vôts e otignût 15 conseîrs (Union Valdôtaine Progressiste: 19,21% dai vôts e 7 elets; ALPE: 12,41% e 5 elets; Partît Democratic: 8,88% e 3 elets). Tra chei altris partîts in corse pes elezions regjonâls, dome il Movimento 5 Stelle cul 6,62% dai vôts al à rivât a vê doi conseîrs elets. Il PdL, che al rapresentave il centri diestre talian, al à cjapât a pene il 4,11% dai consens e nol à vût nancje un elet.
Font: Regione Autonoma Valle d’Aosta, 27-28/05/13; Corriere della Sera, 27-28/05/13

Romanie: i ongjarês a sburtin par vê plui autonomie

La Aleance Democratiche dai Ongjarês in Romanie (RMDSz), partît di riferiment de comunitât magjare che e vîf ta chest paîs, e à domandât di inviâ des riformis costituzionâls che a incressin la autonomie linguistiche e culturâl des comunitâts di minorance e che a permetin la nassite di regjons autonomis ta chês areis là che la maiorance de popolazion e parten a minorancis nazionâls. La ocasion par fâ indenant chestis domandis e je stade chê dal congrès dal partît che si è tignût ai 25 di Mai a Csíkszereda / Miercurea Ciuc, dulà che a àn partecipât no dome i rapresentants dai partîts di maiorance e di oposizion de Ongjarie, ma ancje il prin ministri rumen Victor Ponta. Plui o mancul il 7% de popolazion de Romanie al parten ae comunitât ongjarese, concentrade in particolâr inte part de Transilvanie clamade Székelyföld che si volarès fâ deventâ une regjon autonome cul ongjarês tant che lenghe couficiâl. I rapresentants de comunitât magjare a domandin ancje di gjavâ il riferiment costituzionâl ae Romanie tant che “stât nazion” par ricognossi invezit la pluralitât linguistiche e nazionâl dal paîs. Pal prin ministri Victor Ponta nol sarà facil cjatâ il consens di une maiorance parlamentâr suficiente par otignî chestis modifichis de costituzion, ma si lavorarà par cirî une soluzion il plui pussibil condividude.
Font: Politics.hu, 26/05/13; Balkan Insight, 27/05/13

Galizie: incuintris par une revision des politichis linguistichis

Dopo diviers agns di scuintri dûr cui partîts di oposizion e cu lis organizazions pe lenghe, il guvier galizian al cîr di sbassâ la tension sul teme des politichis linguistichis puartadis indenant dal esecutîf (tes mans de diestre spagnoliste dal PP). Par chest al à inviât une schirie di incuintris, coordenâts dal segretari gjenerâl pe politiche linguistiche Valentín García Gómez, cui diviers partîts rapresentâts intal Parlament de Galizie e cun altris istituzions che si ocupin di chestis tematichis. Il prin zîr di incuintris, che si è tignût ai 28 di Mai, al è stât dome interlocutori. Cundut che si à preseât la volontât di cirî une strade condividude su la cuistion de lenghe, lis oposizions a àn ricuardât che al jere stât propit il guvier dal PP a fâ saltâ i ecuilibris che a jerin stâts cjatâts sul galizian. Se Alternativa Galega de Esquerda no si è presentade par vie che e domandave un confront viert cun ducj i sogjets interessâts e no incuintris bilaterâi, chei altris doi partîts di oposizion – socialiscj e nazionaliscj dal BNG – a àn domandât di revocâ o almancul di suspindi il cussì clamât decret sul plurilinguisim che al ven judicât un pas indaûr rispiet aes politichis par promovi la lenghe galiziane. Par cumò però, l’esecutîf galizian al à fevelât dome di cualchi modifiche al test che e sarà presentade in curt in Parlament.
Font: Xunta de Galicia, 24/05/13; Galicia Hoxe, 31/05/13

Scozie: jutoris par formâ insegnants di gaelic

Tra i obietîfs dal plan nazionâl di politiche linguistiche pal gaelic scozês si à chel di incressi il numar dai fruts che a frecuentin lis scuelis cul gaelic tant che lenghe di insegnament. Par chest si à di incressi ancje il numar di professôrs in stât di insegnâ il e par gaelic. Il Bòrd na Gàidhlig, organizazion di riferiment pe lenghe, al à duncje metût a disposizion jutoris di un miâr di sterlinis par cui che al frecuentarà i cors par inviâ la formazion dai insegnants di cheste lenghe (ITE) in program chest Astât intes universitâts di Aberdeen / Obar Dheathain, dal Strathclyde / Srath Chluaidh, e des Highlands e des Isulis / Gàidhealtachd agus nan Eilean.
Font: Bòrd na Gàidhlig, 24/05/13

Ocitanie: il senât spagnûl al celebre la autonomie aranese

La vilie dai 23 di Avost – date là che 700 agns indaûr il re aragonês Jacum II al ricognosseve ai abitants de Val di Aran la concession di mantignî i lôr dirits, leçs e costums – il Senât spagnûl al à fate buine une mozion là che si ricognòs la specificitât culturâl, storiche, gjeografiche e linguistiche di chest teritori. La mozion e je stade sotscrite di ducj i grups politics rapresentâts in Senât e e ponte a confermâ il rispiet de autonomie di cheste valade ricognossude tant a nivel costituzionâl che dal statût de Catalogne. La Val di Aran, uniche aree dal stât spagnûl là che si fevele par ocitan, e je logade dentri dai confins aministratîfs de Catalogne dulà che e gjolt di une forme speciâl di autonomie che a ‘nt garantìs la specifiche identitât linguistiche e storiche.
Font: EuropaPress, 22/05/13

Gales: standards gnûfs pal galês dome ca di un an e mieç

Il ministri pe lenghe galese, Leighton Andrews, al à fat savê che i nivei gnûfs di tutele e di promozion de lenghe a jentraran in vore tal Novembar di chest an che al ven par chel che al rivuarde lis struturis governativis galesis, lis aministrazions locâls e i parcs naturâi. I “standards” a son il cûr de leç su la lenghe fate buine intal 2011 par promovi il galês e a rapresentin i nivei linguistics minims che la int e à di spietâsi cuant che e à a ce fâ cuntune struture publiche. La iniziative e rive dopo che il guvier galês al veve dite di no ai nivei linguistics fats indenant de comissarie pe lenghe galese che a cjapavin dentri sei i sogjets publics che lis aziendis privadis clamadis a garantî servizis di utilitât publiche. Il responsabil pe lenghe dal partît nazionalist Plaid Cymru, Simon Thomas, al à manifestât la delusion pe decision di limitâ i standards dome ai organisims di guvier dal teritori e di no cjapâ dentri ancje chei sogjets che a fasin un servizi public. Par chei, e je stade la rispueste dal guvier galês, si proviodarà a pene che al è pussibil.
Font: BBC, 17/05/13

Galizie: e nas une associazion par difindi il galizian tai media

Undis mieçs di comunicazion (Radiofusión, Valminor.info, Novas da Galiza, Praza Pública, Galicia Confidencial, Sermos Galiza, Certo, Que Pasa na Costa, O compás da Costa, Tempos Novos e Nova Peneira) a àn metude sù la Associazion dai media par galizian che e je stade presentade in maniere uficiâl ai 16 di Mai a Sant Jacum di Galizie (Santiago de Compostela). I obietîfs principâi de gnove realtât a son chei di infuartî la presince dal galizian in dute la societât e massime intai mieçs di comunicazion, e di cjatâ fûr gnovis stradis di finanziament che a permetin di fâ gjornalisim par galizian in maniere dignitose. Une des primis azions in program e je chê di vierzi canâi di dialic cu lis aministrazions publichis, cui partîts e cu lis organizazions professionâls par svilupâ une gnove leç su la comunicazion istituzionâl che e tegni cont de pluralitât linguistiche e dai media che le rapresentin. Intant de presentazion, i fondadôrs de associazion a àn ricuardât che “O vin une lenghe proprie, une culture che nus insiore, nus diferenzie e nus globalize, une popolazion che e ame la sô tiere e une comunitât che nus ten ducj adun; par chest no si pues fâ di mancul di mieçs di comunicazion par galizian e al è sante scugne che i politics ju rispietin e lis istituzions ju judin”.
Font: Galicia Confidencial, 16/05/13

Sud Tirôl: cu la gnove convenzion plui todesc e ladin in RAI

Ai 16 di Mai e je stade presentade in maniere uficiâl a Rome la gnove convenzion 2013-2015 tra la presidence dal consei dai ministris, la provincie di Bolzan e la RAI par realizâ e trasmeti programs radiotelevisîfs par todesc e par ladin in Sud Tirôl. La convenzion gnove e incrès lis trasmissions par todesc e par ladin, e adate l’organic a chest aument de programazion e e previôt il passaç ae provincie des competencis e dai coscj che fin cumò a jerin cuvierts dal stât centrâl. La provincie e sigurarà di fat un finanziament di 20 milions di euros ad an par 3 agns. In gracie di chestis risorsis si varan ancje grues invistiments tecnologjics che a permetaran di trasformâ chê di Bolzan inte prime sede regjonâl de RAI dute digjitâl.
Font: Adnkronos, 16/05/13