06/02/16

Paîs Basc: dirits dai presonîrs, eurodeputâts in visite

Tra i 14 e i 16 di Fevrâr une delegazion di deputâts dal Parlament european e sarà in visite intal Paîs Basc par cjatâsi cun rapresentants istituzionâi e de societât civîl par fâ il pont su la situazion dai presonîrs politics. A passe cuatri agns de fin de lote armade, plui di 400 bascs si cjatin ancjemò intes presons spagnolis e uns 70 ta chês francesis. Si trate di un teme une vore sintût intal Paîs Basc là che la bataie pe difese dai dirits dai presonîrs e à simpri cjatât une poie trasversâl. La sô soluzion duncje e judarès a dâ fondis plui saldis al procès di pâs. Prime che une cuistion politiche, si trate però di garantî il rispiet dai dirits umans: la politiche penitenziarie e massime la dispersion dai presonîrs intai sîts i plui lontans dal lôr paîs di divignince, di fat, e va fintremai cuintri de legjislazion statâl. Un dai compits dai eurodeputâts al è chel di difindi i dirits umans, al à ricuardât un dai parlamentârs che a saran intal Paîs Basc, tal marcâ la preocupazion pe maniere che la Spagne e trate i presonîrs bascs. La delegazion e je formade di eurodeputâts espression di nazionalitâts minorizadis (catalans, galizians e flamants), di stâts nordics (Letonie e Svezie) e de çampe radicâl (la todescje Die Linke e l’irlandês Sinn Féin).
Font: Naiz:, 28/01/16

Kurdistan / Turchie: secont congrès dal HDP

Ai 24 di Zenâr si è tignût a Ankara il secont congrès dal HDP, il Partît Democratic dal Popul, che al fâs di riferiment politic pe comunitât curde che e vîf intal stât turc, ma ancje pe part plui progressiste de popolazion turche. L’apontament al è colât intun moment dramatic pe popolazion curde, cun diviersis citâts che si cjatin sot assedi e distrets intîrs declarâts “areis di sigurece” là che l’esercit turc e lis fuarcis di polizie, cu la scuse de lote cuintri dal PKK, a tegnin in ostaç dute la popolazion e a son autôrs di sassinaments e violencis cuintri di civîi. Ancje fûr de aree plui cjalde, lis organizazions curdis e il stes HDP a son al centri di agressions de bande di nazionaliscj turcs e di persecuzions poliziâls o judiziariis. Intant de presidence Erdogan, di fat, a van dilunc a cressi lis misuris autoritariis e la repression di ogni forme di dissidence. Al congrès a partecipavin sei rapresentancis curdis rivadis di Sirie, Iraq e Iran, sei delegazions internazionâls tant che chê de Aleance Libare Europeane che e à confermât la sô poie ae cause curde e l’impegn a lavorâ intes istituzions europeanis par fermâ l’autoritarisim di Erdogan e la repression des organizazions e des comunitâts curdis.
Font: EFA, 27/01/16

Spagne: cuart rapuart su la Cjarte europeane des lenghis

Intal cuart rapuart sul rispiet de Cjarte europeane des lenghis regjonâls o minoritariis intal stât spagnûl, il comitât di esperts dal Consei de Europe al à segnalât diviers elements critics massime intal cjamp de aministrazion de justizie, de educazion e de salût publiche. Par chel che al rivuarde la justizie, il Consei de Europe al invide il stât spagnûl a garantî che lis autoritâts judiziariis penâls, civîls e aministrativis in vore tes comunitâts autonomis a sedin in stât di puartâ insom i procediments, dal principi ae fin, intes lenghis couficiâls e che il personâl che al lavore ta chescj teritoris al cognossi la lenghe dal puest. Si domande po che lis lenghis minorizadis a vedin une presince juste intes aministrazions statâls logadis tes comunitâts autonomis, che al sedi garantît il lôr ûs intai servizis publics, a tacâ di chei sociosanitaris, e che l’infuartiment de tierce lenghe intai percors educatîfs nol vegni fat a dam des lenghis couficiâls. Se chestis a son racomandazions validis in misure plui o mancul marcade par dutis lis comunitâts minorizadis, ancje chês plui fuartis tant che catalans e bascs, a ‘nd è altris che a tocjin in maniere plui specifiche chês plui debulis tant che asturians e aragonês. Ta chest câs si invide lis autoritâts statâls e chês autonomichis a ricognossi la couficialitât di chestis lenghis e a procedi cu lis misuris che a compagnin chest passaç. A son po indicazions specifichis che a integnin i singui teritoris, come tal câs de comunitât valenziane là che si bat massime su la dibisugne di garantî une radiotelevision publiche inte lenghe proprie.
Font: ACPV, 26/01/16

Paîs Catalans: tes Baleârs, catalan recuisît par lavorâ tal public

La cognossince de lenghe catalane e je di gnûf un element necessari par podê lavorâ intune aministrazion publiche des Baleârs. Ai 26 di Zenâr il Parlament des isulis al à fate buine la modifiche de normative su la funzion publiche che lu previôt e che e jere stade proponude dal Partît Socialist, di Podem, di Més per Mallora, di Més per Minorca e di Gent per Formentera. Di cumò indenant, duncje, par lavorâ intai uficis che a dipendin de Comunitât autonome, dai Conseis des isulis e des aministrazions comunâls al coventarà ancje cognossi la lenghe proprie. Si torne cussì al sisteme in vore fin al 2012 cuant che l’esecutîf di diestre (PP) che al guviernave lis isulis, inte suaze de sô ofensive anticatalane, al veve fat de cognossince de lenghe juste un titul di mert e no plui un recuisît par lavorâ tai uficis publics.
Font: VilaWeb, 26/01/16

Scozie: in cressi il numar dai insegnants di/par gaelic

Tai ultins agns al va dilunc a cressi in Scozie il numar di insegnants cualificâts in stât di insegnâ il e par gaelic. Vie par chest an scolastic a son 35 chei jentrâts in servizi intes scuelis primariis e secondariis di prin grât. L’an prime a jerin stâts 30, chest an che al ven si stime che a saran 37. Il sucès dal percors di formazion e il cressi dai istitûts là che il gaelic al è doprât tant che lenghe di insegnament al ven let dal Bòrd na Gàidhlig, l’ufici pe lenghe gaeliche, tant che un sburt par lâ indenant cu lis azions imbastidis tai chescj agns massime tal cjamp de istruzion. Il ministri scozês pes lenghis, Alasdair Allan, al à dite che gnovis misuris par infuartî chest percors a saran a disposizion in curt cu la gnove leç su la educazion.
Font: Bòrd na Gàidhlig:, 25/01/16

Bretagne: mobilitazion par une leç pes lenghis “regjonâls”

Tal 2010 il Parlament francês al veve fermât lis propuestis par une leç di suaze pes lenghis e pes culturis minorizadis. L’an passât il Senât al à blocât al ultin moment la ratifiche de Cjarte europeane des lenghis regjonâls o minoritariis. Tor de metât di Zenâr la Assemblee francese e à boçât ancje la propueste di leç su lis lenghis minorizadis fate indenant dal deputât Paul Molac. Denant di chest cuadri, uns sessante associazions sociâls e culturâls bretonis, a partî des rêts Diwan e Stumdi, a àn firmât une letare che ai 25 di Zenâr e je stade inviade a ducj i deputâts elets in Bretagne par che si cjapin sù lis lôr responsabilitâts. A mancjin ancjemò 17 mês prime de fin de legjislature, a disin i firmataris, e al è duncje avonde timp par presentâ e par fâ buine une leç di suaze pe difese e pe promozion des lenghis minorizadis. Vonde cu lis peraulis, si lei inte letare, cumò di voaltris si spietìn dai fats.
Font: Agence Bretagne Presse, 25/01/16

Ocitanie: une cuarantine di iniziativis pe Dictada Occitana

A son uns cuarante i lûcs là che ai 30 di Zenâr si son davueltis iniziativis inmaneadis pe Dictada Occitana. La manifestazion e je nassude intal 1998 cun chê di promovi la lenghe e la culture ocitane. Dongje dal event centrâl dedicât ae peraule lete e scrite par ocitan, lis diviersis iniziativis a àn proponût ancje concierts, conferencis, spetacui teatrâi e bai. A dâi acet aes iniziativis no son stadis dome localitâts ocitanis, ma ancje dai Paîs Catalans (Barcelone, Valéncia e Palma) e de France (Parîs).
Font: Jornalet, 24 e 31/01/16; VilaWeb, 29/01/16

Corsiche: mobilitazions dai students pai presonîrs politics

Lis ultimis dôs setemanis di Zenâr i students des superiôrs a son stâts protagoniscj di protestis e mobilitazions che a àn interessât dutis lis citâts principâls de Corsiche. In rispueste al apel de organizazion Associu Sulidarità, i zovins a son lâts in place par domandâ di meti fin ae repression cuintri dai presonîrs politics cors. A distance di cuasi doi agns de fin de lote armade, no dome no si à ancjemò cjatât une soluzion pe cuistion dai presonîrs ma lis lôr cundizions a van fintremai in piês. Diviers di lôr si cjatin in regjim di isolament in celis là che lis temperaduris a van jù ancje sot zero. Une disine e je cumò in siopar de fam. I students a àn manifestât pes stradis di Aiacciu / Ajaccio, Bastia, Corti / Corte, Portivechju / Porto-Vecchio, A Ghisunaccia / Ghisonaccia, Lucciana / Ucciani, Ulmetu / Olmeto, Luri e L’Isula.
Font: Alta Frequenza, 22-26/01/16; Jornalet, 25/01/16

Polonie: atacs violents in Parlament cuintri dai slesians

Tal 2011 847 mil personis a àn declarât intal censiment uficiâl fat in Polonie di sintîsi slesians. Tal 2014 passe 120 mil personis a àn firmât une petizion par che lis istituzions polachis a ricognossin la Slesie tant che regjon autonome e il status di minorance pe sô popolazion. Cuant che, sul prin di tacâ di chest an, la cuistion e je rivade al esam dal Parlament di Varsavie i rapresentants dal partît autonomist Ruch Autonomii Slaska si son cjatâts al centri di ofesis e di atacs verbâi di ogni sorte de bande dal partît di maiorance e di chês altris fuarcis nazionalistis e populistis. I membris dal partît autonomist a son stâts batiâts di traditôrs e nemîs de Polonie, e al è cui che al à dite che a varessin di jessi metûts sot procès e cui che a meretaressin justiziâts. Atacs che a àn lassât scaturîts ancje i rapresentants de Aleance Libare Europeane, che il Ruch Autonomii Slaska al è un dai membris. La Aleance e à za fat savê che e puartarà la cuistion denant des istituzions europeanis – Comission, Consei e Parlament – par domandâur che a metin in at lis azions che a coventin par fâ rispietâ chei dirits che a varessin di jessi la fonde de Union Europeane.
Font: EFA, 18/01/16

Galizie: nuie par galizian, campagne cuintri Endesa

La compagnie Endesa e rigjave de Galizie energjie par pôc mancul di 3 milions di kW tra centrâls termichis, parcs eolics e altris implants, chel istès no ufrìs ai galizians nissun servizi te lôr lenghe proprie. Cundut dai vuadagns che la societât energjetiche e fâs ta cheste comunitât, no je olme di galizian intal so sît internet, inte sô documentazion e nancje intal servizi telefonic pai utents. Denant di chest compuartament, che al sbelee lis domandis rivadis di cetancj galizians, la organizazion A Mesa pola Normalización Lingüistica e à inviât une campagne che, in plui di denunciâ chest compuartament, e invide la int a subissâ la campagnie di messaçs là che si domande servizis par galizian. Cun di plui A Mesa e ricuarde che se Endesa e altris gruessis compagniis a garantissin servizis ancje inte lenghe locâl, la Galizie no si varès cjatade tai ultins agns a pierdi plui di 2 mil puescj di vore tal cjamp dai servizis telefonics par utents.
Font: A Mesa, 15/01/16

26/01/16

Stât francês: lenghis minorizadis, boçade une altre leç

Nuie di fâ pe propueste di leç su lis lenghis minorizadis fate indenant dal deputât breton Paul Molac. Dopo dal bloc de ratifiche de Cjarte europeane des lenghis regjonâls o minoritariis de bande dal Senât, la iniziative e pontave a infuartî la presince di chestis lenghis te scuele, tai media e tai spazis publics. Tra i obietîfs de propueste si veve chel di slargjâ lis oris di insegnament des lenghis minorizadis, di ufrî plui garanziis ancje sul plan economic aes rêts privadis di insegnament a imersion, e di incressi la programazion intes lenghis locâls su la radiotelevision publiche. La Assemblee statâl francese e à frontât il test tor de miezegnot dai 14 di Zenâr cuant che in aule no jerin nancje trente deputâts. Ae fin, cun 14 vôts cuintri e 13 a pro, la propueste di leç e je stade boçade.
Font: Jornalet, 15/01/16

Paîs Catalans: iniziative par un spazi linguistic comun

A son za 129 lis realtâts associativis dal Paîs Valenzian, tra associazions, partîts, sindacâts e media, che a àn sotscrit il manifest Enllaçats per la Llengua (unîts pe lenghe) par domandâ un spazi di comunicazion comun par catalan e une unitât di azion par difindi e par valorizâ la lenghe. Tra lis misuris pratichis di meti in at, intal document si propon di tornâ a inviâ la radiotelevision publiche valenziane (RTVV) sierade intant de legjislature stade e di garantî la pussibilitât reciproche di vê acès ai mieçs di comunicazion par catalan in onde in Catalogne, tes isulis Baleârs e te Comunitât Valenziane. Si domande po di inviâ un coordenament des politichis linguistichis cun riunions periodichis tra lis istituzions di chestis trê comunitâts autonomis e di chês altris tieris là che si fevele par catalan, ven a dî une part dal Aragon, Andorra, la Catalogne Nord e la citât dal Alguer. A dâ la lôr poie al manifest a son ancje un mieç miâr di personalitâts dal mont culturâl, politic e mediatic dai paîs di lenghe catalane.
Font: El Periodico, 11/01/16

Paîs Catalans: Puigdemont president pe indipendence

Domenie ai 10 di Zenâr Carles Puigdemont al è stât elet tant che 130esim president de Generalitat, o sei dal guvier de Catalogne, cun 70 vôts a pro, 63 cuintri e 2 astensions. A sostignîlu lis listis di Junts pel Sí e de CUP che, dopo setemanis di confronts e di scuintris, juste la zornade prime a vevin rivât a cjatâ un acuardi sul non dal president e sul program di guvier. Intai ponts dal acuardi, la CUP si cjape sù la responsabilitât di timps cussì luncs par cjatâ une convergjence tra lis dôs animis di riferiment dal indipendentisim catalan e si impegne a lavorâ par tornâ a costruî la fiducie intai citadins e a dâ un segnâl di discontinuitât ancje inte composizion dal so grup parlamentâr. La formazion de çampe libertarie pe indipendence e à però otignût che si sieràs la ete vuidade di Artur Mas che, ai 12 di Zenâr, al à passât in maniere uficiâl la incarghe di president a Carles Puigdemont, e che intal program di guvier a fossin dentri ancje misuris sociâls impuartantis par dâ une man ae part plui debule de societât catalane. Si trate di une legjislature di transizion – al à marcât il gnûf president – che e à di puartâ de autonomie ae indipendence. Par chest, tra i ponts di svilupâ, o cjatìn dute une schirie di proviodiments par infuartî i orghins za in vore e creânt di gnûfs che a puedin sostignî il percors de indipendence sul plan dal stât sociâl, de economie, dai tribûts, des financis, de sigurece e des infrastruturis. Si metarà sù ancje un dipartiment pai afârs forescj cu la incarghe di stâi daûr ai negoziâts cul stât spagnûl e cu lis istituzions europeanis.
Font: VilaWeb, 09-12/01/16

Paîs Basc: in miârs a Bilbo e Baiona pai dirits dai presonîrs

Almancul 63 mil personis a Bilbo/Bilbao e altris 8 mil a Baiona/Bayonne si son dadis dongje sabide ai 9 di Zenâr daûr dal sproc Mugi daitezen harriak, o sei “che si movin lis pieris” che a pesin sui dirits dai presonîrs. Une mobilitazion moltitudinarie e trasversâl che e à unitât la part meridionâl dal Paîs Basc sot aministrazion spagnole e chê setentrionâl sot aministrazion francese intun unic abraç ai centenârs di presonîrs politics che a son ancjemò sierâts intes galeris dai doi stâts. A passe cuatri agns di distance de fin de lote armade di ETA a son di fat ancjemò 402 i bascs impresonâts intal stât spagnûl par reâts di nature politiche, pe plui part no di sanc, e 72 chei impresonâts in France. Cuasi 250 in mancul di cuatri agns indaûr, ma dome par vie de fin de lôr pene e no dal sigûr in gracie di proviodiments cjapâts dai doi stâts. Cun di fat, ta chescj agns, la politiche di dispersion e di isolament dai presonîrs bascs si è fate se pussibil ancjemò plui dure. La percentuâl di dispersion ator pes diviersis presons e je cressude aumentant cussì ancje l’isolament dai singui presonîrs. A cressi e je ancje la distance dai lûcs di detenzion rispiet al Paîs Basc che e condane ancje lis lôr fameis a viaçs simpri plui luncs e faturôs. Baste pensâ che tal stât spagnûl, contrari di ce che e previodarès la leç, la plui part dai bascs si cjate tes presons plui lontanis di cjase lôr, o sei chês andalusis, valenzianis o de Murcia. Une politiche carcerarie che e à plui a ce viodi cul svindic che no cu la leç, cemût che a àn denunciât i partecipants aes manifestazions di Bilbo e Baiona. La rêt sociâl Sare che lis à inmaneadis e à fat savê che e sviluparà gnovis iniziativis paîs par paîs e une ofensive judiziarie a nivel european a pro dai dirits dai presonîrs.
Font: Naiz:, 08-10/01/16

Bretagne: invît a meti sù une conference regjonâl slargjade

Il gnûf president de Regjon Alsazie – Champagne – Ardenis – Lorene, Philippe Richert, intant dal so discors di insediament si è impegnât a meti sù une conference là che a puedin partecipâ ancje chês fuarcis che a àn vût un consens impuartant a nivel locâl ma par vie dal sisteme eletorâl no son rapresentadis intal Consei regjonâl, in primis i autonomiscj alsazians di Unser Land e i ecologjiscj – regjonaliscj (EELV), in maniere che a puedin dî la lôr su lis decisions principâls che il Consei al cjaparà. Un esempli che al sarès di espuartâ ancje inaltrò, al à comentât Christian Troadec che, ae vuide de coalizion sovraniste Oui la Bretagne, intes ultimis elezions al veve cjapât il 6,71% dai vôts cence rivâ però a jentrâ in Consei regjonâl. Troadec al à duncje domandât ancje al gnûf president de Regjon Bretagne Jean-Yves Le Drian di meti sù une conference regjonâl slargjade.
Font: Agence Bretagne Presse, 07/01/16

Cravuazie: serps in spiete des decisions dal gnûf guvier

La comunitât serbe de Cravuazie e je inmò in spiete di cognossi la politiche che il gnûf guvier jessût des elezions che si son tignudis in Novembar al metarà in vore tai siei confronts. Dopo di un prin moment là che al someave che si varès metude su une coalizion progressiste vuidade dal Partît Sociâl Democratic, si à invezit cjatât un acuardi tra la HDZ (Union Democratiche Cravuate) e la liste Most. Il president de HDZ, Tomislav Karamarko, e chel di Most, Bozo Petrov, si son impegnâts a miorâ lis relazions cu la Serbie, ma chest nol significhe in automatic che si vignarà incuintri aes dibisugnis de minorance serbe che e vîf in Cravuazie. Cun di fat, rapresentants de coalizion a àn za fat intindi che, siben che lu previodi la leç, inte citât di Vukovar tabelis publichis e segnaletiche stradâl a restaran dome par cravuat ancje se la popolazion serbe e je un tierç dal totâl. Si à però di dî che tai ultins agns, cuant che la diestre nazionaliste e je stade al podê, e je stade une vore mancul ative tal atacâ i dirits des minorancis di cuant che e je stade ae oposizion. Pai rapresentants de gnove maiorance i problemis si comedaran, ma a fasin ancje intindi che i volarà timp parcè che lis feridis lassadis de vuere cu la Serbie a son inmò masse resintis.
Font: Balkan Insight, 06/01/16

Asturiis: prin pas pe classe di insegnament pal asturian

Il responsabil pe educazion dal guvier asturian, Genaro Alonso, al à comunicât che il ministeri spagnûl pe istruzion al à acetât di meti sù une comission di lavôr par svilupâ un decret che al ricognossi une classe di pueste pal insegnament de lenghe e de leterature asturiane. Par rivâ a chest risultât lis autoritâts des Asturiis a àn vût di pressâ no pôc il guvier centrâl che al à in fin acetât di ricognossi ancje l’asturian inte suaze des specialitâts, o sei lis categoriis uficiâls che a son organizâts i insegnants. La prime riunion dal grup di lavôr e je fissade pai 9 di Març.
Font: La Nueva España, 02/01/16

Paîs Catalans: fieste pai 40 agns de La Bressola

Ta chestis zornadis si son davueltis iniziativis par celebrâ i 40 agns de Bressola, o sei de rêt scolastiche privade a imersion che e à garantît la istruzion par catalan a miârs di fruts che a vivin inte Catalogne Nord sot aministrazion francese. La Bressola, di là de sô funzion specifiche, e rapresente une des entitâts principâls inte difese de identitât e de lenghe proprie di cheste part de Catalogne. Pal so complean al è jessût ancje un sît internet dut gnûf (www.bressola.cat) che, dongje di jessi plui dinamic e siôr, al ufrìs ancje dai blogs personalizâts par ognidune des scuelis de rêt. Magari cussì no, dopo vê patît ta chescj agns pidiments di ogni sorte massime sul plan politic e economic, la Bressola e à ancjemò problemis di frontâ, a tacâ de mancjance di un numar suficient di struturis. Par esempli, tal an 2015-2016, i fruts che a studiin tes scuelis di cheste rêt a son 987, ma si à vût di refudâ la domande di altris cincuante di lôr par vie che no jerin avonde spazis par ducj.
Font: Bressola.cat, 01/01/16

Paîs Basc: definît il ripart dai fonts de CAB pe lenghe

Intal belanç 2016 de Comunitât Autonome Basche, scuele e radiotelevision publiche a part, i fonts pe promozion dal euskara a sfiliin i 46 milions di euros. La plui part des risorsis, passe 30 milions di euros, e va al istitût pe alfabetizazion dai adults HABE par cors in struturis comunâls o privadis, ma ancje par jutoris direts ai arlêfs. Pai contribûts pal basc intai mieçs di comunicazion si previodin invezit cuasi 5 milions; pôc mancul si dividaran aministrazions locâls e impresis pe promozion de lenghe intai rapuarts cul public e sui lûcs di vore. Passe 3 milions a laran par progjets specifics presentâts des realtâts associativis ativis sul teritori e 1 milion pe promozion sociâl dal euskara.
Font: Noticias de Gipuzkoa, 31/12/15

Galizie: ultins pas pal prin plan linguistic pe economie

Al è stât presentât intal Parlament de Galizie, prime de sô aprovazion definitive de bande dal esecutîf, il plan 2015/2020 par promovi il galizian intal tiessût economic de comunitât. Il document al previôt 84 intervents par incressi l’ûs e la visibilitât de lenghe ta chest setôr. Si trate dal prin plan linguistic che il guvier de Galizie al svilupe pal compart economic cun chê di creâ la cussience che l’ûs dal galizian al pues favorî lis relazions lavorativis, comerciâls e bancjariis, di incressi l’ûs de lenghe ta chescj cjamps, e di stiçâ i consumadôrs a domandâ prodots etichetâts par galizian. Par chest si previodin percors di formazion linguistiche specifics, ponts informatîfs pes impresis, incentivazion pes etichetis in lenghe proprie, campagnis promozionâls e certificazions di cualitât ancje pe lenghe.
Font: Lingua.gal, 29/12/15